صندوق الصادرات الاستثماري
تغطية خاصةحواراتولايات

والي الجزيرة يدلي بتصريحات مثيرة ل “السوداني” حول ما يتعرض له الولاة العسكريون بالولايات

 

 

 

 

والي الجزيرة لـ(السوداني): مطالبة الولاة بإعفائهم لشعورهم بأنهم أثروا على القوات المسلحة

 

\\\\\\\\\\\

نتعرض لاستفزازات وكان مشيناً “في بيت البكا نشيل فاتحة في زول بيكورك ليك (مدنياو)”
\\\\\\\\\\\\

ما في سبب بيخليني أعادي زول

\\\\\\\\\\\\

مستعد للتعاون مع الحرية والتغيير وخدمة أهلنا نقبل فيها حتى الذلة والإهانة

\\\\\\\\\

الولاة العسكريون تسلموا أول مرتب الشهر الماضي والفترة الفاتت شغالين (ملح)

\\\\\\\\\\\

المدير التنفيذي لمحلية الكاملين ما قادر يمشي مكتبو بسبب الاستفزازات

مشروع الجزيرة يحتاج لقرار سيادي وأحلنا تجاوزات كثيرة في المال العام للنيابة

ولاية الجزيرة كغيرها من الولايات الأخرى تعاني من إشكاليات عديدة في ملفات عدة.. (السوداني)

استنطقت والي الجزيرة المكلف اللواء أحمد حنان في عدد من الملفات المتعلقة بأزمات الوقود والخبز والطرق بجانب مشروع الجزيرة وسر مطالبتهم كولاة بإعفائهم من مناصبهم بجانب علاقته بقوى الحرية والتغيير بالولاية في ظل معلومات تتحدث عن توترات في العلاقة بين بعض الولاة وقوى والتغيير بولاياتهم.

حوار محمد البشاري

السبب شنو وراء مطالبتكم الجماعية كولاة لإعفائكم من مناصبكم؟

حسينا نحن كـ(18) والي وديل (18) فرقة أثرنا على القوات المسلحة ومفروض أضطلع بمهامي كقائد للفرقة لأنو مسؤولياتي كبيرة ووجدنا صعوبة في تولي المنصبين، الحاجة التانية الناس نادت بالدولة المدنية والتكليف فترته ما طويلة عشان يتخذ قرار يجيب ولاة مدنيين حتى نتفرغ نحن للقوات المسلحة والقوات المسلحة دايرانا وما رافضانا وما قنعت مننا ونحن خشينا القوات المسلحة لأهداف ووصلنا مراحل متقدمة ودايرين نواصل فيها وننهي مسيرتنا في القوات المسلحة ونحن شلنا ليك شيلة في وقت معين عشان كده رجعنا القوات المسلحة نرتاح نشوف شغلتنا والشغلة متعبة في ظروف متعبة وما ميسر ليك أو مسهل ليك كل شي حتى التشريع ما ميسر لينا بشأن المحاكمات الرادعة وما مطلوق لينا يد العنان حتى نسيطر، والدولة لازم يكون عندها هيبتها، كل من هب ودب يجوك أو يجوا للمحلية يقولوا ليك دا ما دايرنوا ودا ما دايرنوا، وبخشوا إدارية بقفلوها.

والي جنوب دارفور ذكر أنه يتعرض لاستفزازات هل هي واحدة من أسباب مطالبتكم بالإعفاء؟

نحن كان مشينا بيت بكا نشيل فاتحة في زول بيكورك ليك (مدنياوو) أنا داير أعرف مشكلتي شنو لأني لابس كاكي لو كنت لابس مدني دي حتزول يبقى إذا كان بزوالنا نحن كعسكريين من الولايات بتزول المسألة فلتبقى نحن نرتاح وهم يرتاحوا لو قلت ليك ما في استفزازات بكون كذبت عليك لأنو كونوا يستفزوا ليك إدارية ومحلية من المحليات، أقول ليك المدير التنفيذي لمحلية الكاملين جاءنا وقال ما قادر يمشي مكتبو ولا بيخشو ولا بيقدر، وأنا مشيت مع (4) من أعضاء المجلس السيادي لمنطقة (أم قرقور) لتوزيع إغاثة وعندهم أكثر من (30) منزل منهار وناس الحرية والتغيير وصلوا قبلنا للمنطقة والزمن كان غير متاح حتى يعود الوفد، ولما قلت أقدم أعضاء السيادي أثناء البرنامج (خطف) أحد الشباب المايكرفون وقال: الوالي تجاوزنا ورددت عليه بأننا لن نتجاوزكم وبررت الأمر بضيق الوقت، بعض من الناس بتسمي نفسها الحرية والتغيير بيخلقوا حاجات استفزازية كتيرة جدا، والاستفزاز أشكاله كثيرة شيء حسي وآخر معنوي، وأهدافنا تحقيق أكبر خدمة لأهلنا عشان كده مرات حاجات زي دي ما بتهمنا كتير لكن لما محلية كاملة تتقفل تسوي شنو وتشتغل كيف، نحن ما طلاب سلطة وأول مرة أخش مكتب والي هذا المكتب وعمري في العسكرية أنا ضابط ما خشيت مكتب والي أو معتمد، يعني ما كايسين سلطة ومن مصلحتنا تبقى حكومة مدنية ونتعاون مع مكونات الحرية والتغيير في مصلحة وخدمة أهلنا وأنا جاتني مبادرات كتيرة من مجموعة كبيرة من الحرية والتغيير وفي مبادرات استفدت منها وفي ناس حلت معانا قضايا وفي ناس من الحرية والتغيير اشتغلت معانا شغل ممتاز وديل أصلا ما ممكن تستغنى عنهم ولا يعادوك ولا تعاديهم واحتمال الناس العاملة ضجة دي نسبت نفسها للحرية والتغيير ونحن ما خصم ليهم وزي ما قال أحد الولاة ما في داعي لي يسقط يسقط حكم العسكر طالما انت قعدت معاهم في طربيزة واحدة.

العلاقة بين الوالي وقوى الحرية يشوبها التوتر؟

عقدوا اجتماعهم وسموا لجنة عليا لإدارة الأزمات ودعوا رئيس اللجنة الاقتصادية وملكهم كافة المعلومات وقلنا لقوى الحرية أمشوا اعتمدوا لجان التسيير عشان يكون عندكم الحق عشان تقبض بتاع المخبز ومشوا وتاني ما جوني وقلت ليهم اشتغلوا في الأحياء ومافي زول بيرفض، أصلا ما في سبب بيخليني أعادي زول وأنا في فترة تكليف أعادي زول لي شنو.

في اتهامات ليك بالاستعانة بكوادر المؤتمر الوطني؟

قالوا الوالي كون لجان من الكيزان والدولة ما زالت عميقة.. قرار حل اللجان قرار سيادي أنا أبقى والي كيف وأخالف قرار سيادي إذا أنا ما داير أنفذ كلام الزول الأعلى مني هو بيخليني وأنا ما بعتمد اللجان وده شغل قواعد ومافي سبب يخليني اخالف وأعين ديل وأجيب ديل، واللجنة الشعبية ما ممكن تكون هسه موجودة نهائيا ولا أنا ممكن أعمل حاجة زي دي ولا دي شغلتي عشان أعملها، وفي موضوع رغيف دايرين يشيلوا الوالي والوالي أساسا قال ما داير وقال شيلوني وأقولها بكل صراحة قبلنا التكليف لخدمة أهلنا ونقبل فيها أي شي ذلة وإهانة ونبز، وعارفين إنه موقف صعب لكن نحن قبلنا التكليف لحين الانتهاء من تكليفنا وحنشتغل حتى إنهاء تكليفنا وما دايرين شكر لأنو خدمة أهلنا ما دايرين فيها شكر ولعلمك الشهر الفات حتى استلمنا مرتب يعني ما كنا شغالين بي مرتب، وما أنا، كل الولاة كنا شغالين (ملح) بي مرتبنا بتاع الجيش، أنا على استعداد أتعاون مع الحرية والتغيير والوحيدين الما بتعاون معاهم ناس المؤتمر الوطني لأنو المرحلة قالوا ما تتعاونوا معاهم خلاص دي تعليمات وقالوا ما في وجود لمنسوبي المؤتمر الوطني يبقى ما في وجود ليهم لكن تاني نحن نتعاون مع أي زول وأي زول داير يساعدك بتدس منو المحافير؟

يقال إن الولاة يشتكون من تعدد ممثلي قوى الحرية والتغيير؟

وزير ديوان الحكم الاتحادي ذكر أن بعض الولايات ناس الحرية والتغيير قالوا الولاة ما متعاونين معاهم ورد عليه أحد الولاة أبلغونا بممثلين الحرية والتغيير في الولايات عشان نتعامل معاهم وده نحن الدايرينه عشان نميز الخبيث من الطيب لأنو بتحصل إنو يجوك ناس من الحرية والتغيير يقول ليك ديل ما تابعين لينا.

هناك ملاحظة عن تباعد واضح بين العسكريين والمواطنين ما تعليقك؟

السؤال كان يوجه للمدنيين ونحن جيش واحد شعب واحد والأمن والأمان للمواطن حاجة مقدسة ولا نالوا جهدا في تنفيذ كلامنا والتباعد ما عندنا في الجزيرة وده حدث فيما يسمى بفض الاعتصام وهو شي وحدث والناس مفروض تتجاوزو طالما اتشكلت ليهو لجنة تحقيق وتاني إتشكلت ليهو لجنة والعسكريين ما بيرفضوا محاسبة زول ونحن عندنا المحكمة العسكرية وليست مدنية والمحكمة العسكرية أردع لأنها قوات نظامية ونحن كقوات مسلحة ونظامية ما عندنا إشكالية مع المدنيين لأننا جئنا من رحم المدنية.

ماذا بشأن حصر أصول المؤتمر الوطني بالولاية وواجهاته، وهل تم تقييمها مالياً؟

هو كان قرار بحصر العربات فقط ما الأصول كاملة لأنه ما حتصل للأصول بتاعت المؤتمر الوطني وده قرار رئاسي واللجنة التي تم تشكيلها في الولاية رفعت الأمر للرئاسة ولم يبت فيها.

مواطن الجزيرة يعاني من غلاء في المعيشة، ما تعليقك؟

السلع المدعومة نحرص على إيصالها للمواطن بالأسلوب الأمثل من حيث استلامها ومراقبتها، ومن ناحية الوقود مرتاحين من أداءنا الموجود أما الخبز حتى الآن وبكل صدق ما وصلنا فيه لما نريد ومجتهدين اجتهاد كبير، أما السلع غير المدعومة فعملنا منافذ للبيع المخفض وتحرير السوق بيخلى مسائل كتيرة ما نسيطر عليها.

الواضح أن الطرق بالولاية تحتوى على أخطاء هندسية يصفها البعض بالكارثية ماذا أنت قائل؟

لاحظنا للمسألة في الخريف ومدينة ودمدني في الخريف وكان في تكسير للبلوك في المظاهرات، وكان في طرق ما عبرتها المياه ونحن شكلنا لجنة لتقصي الحقائق في الطرق التي تأثرت بالخريف وإمكانية صيانتها كما وجهنا بأن أي شي يتضح به شبهة فساد حسب توصيات اللجنة سنحيله لنيابة الفساد والجهات العدلية واستعجلنا اللجنة لرفع تقريرها.

متى سيعود مشروع الجزيرة لسيرته الأولى؟

مشروع الجزيرة الإشراف عليه من المركز أكبر من الولاية، المشروع يحتاج للكثير وعشان نعيد المشروع عنده أصول وهناك قانون 2005 وده قانون معيب، إمكانية عودة المشروع سهلة بإرجاع أصوله، والمحالج تم تمليكها لـ(183) من عمال المحالج وكانوا عايثين فيها فساد والمراجع العام طلع تجاوزات كتيرة في المال العام وحولنا الملف لنيابة المال العام وخشوا معانا في طعن بأننا لسنا الجهة التي تقوم بمراجعتهم ونحن قلنا في تجاوزات والقانون يأخذ مجراه وده من أسباب تدهور المشروع، وحتى البيوت التي كانوا يسكنوها تم تمليكها لهم.

مقاطعاً: ومن ملكهم الأصول هل هم ولاة سابقون أم إدارة المشروع؟

لا ولاة سابقين ولا إدارة المشروع القانون هو الفرتق المشروع وترك الأمر للمزارع ومصانع تم تمليكها، و50% من القمح البناكل فيهو من مشروع الجزيرة، ومشروع الجزيرة محتاج لقرار سيادي وتشكيل لجنة لمراجعة المشروع وتراجع أصوله ويبدأ التأهيل والدعم، ومشروع الجزيرة ترجع أصوله ويعاد تأهيل الأصول لإرجاع المشروع.

هل في خطوات للطلب من المجلس السيادي لاستصدار قرار بإعادة هذه الأصول؟

في خطوات ونحن ساعين وفي ورش تم عقدها ونحن ما دايرين (ننظر) ونحن داير نوصله بأسلوب مبسط، ونحن محتاجين نرفع ملفنا للجهات السيادية بأسلوب مبسط لاستصدار قرار بتشكيل لجنة عليا تعيد الأصول وتشكيل لجنة من وزارة الزراعة لإعادة تأهيل مؤسسات المشروع.


انضم لقروب النورس نيوز على واتسب 


اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *